ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិ តាមរយៈសេចក្ដីប្រកាសព័ត៌៌មាននាថ្ងៃទី០៥ ខែកុម្ភៈបានឱ្យដឹងថា សម្តេចមហាបវរធិបតី ហ៊ុន ម៉ាណែត នឹងអញ្ជើញបំពេញទស្សនកិច្ចផ្លូវការនៅឯព្រះរាជាណាចក្រថៃ នៅថ្ងៃទី០៧ ខែកុម្ភៈ ឆ្នាំ២០២៤ ខាងមុខនេះ តបតាមការអញ្ជើញរបស់ឯកឧត្តម សេដ្ឋា ថាវីស៊ីន នាយករដ្ឋមន្ត្រីនៃព្រះរាជាណាចក្រថៃ។

ក្នុងដំណើរទស្សនកិច្ចនេះ ក៏នឹងមានវត្តមានអមដោយលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ព្រមទាំងវត្តមានរបស់លោក ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា , លោក សុខ ចិន្តាសោភា រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ ព្រមទាំងមន្រ្តីសំខាន់ៗមួយចំនួន និងថ្នាក់ដឹកនាំវិស័យឯកជននៃសភាពាណិជ្ជកម្មកម្ពុជា។ 

អំឡុងដំណើរទស្សនកិច្ច សម្តេចធិបតី នឹងលោកជំទាវ នឹងចូលក្រាបបង្គំគាល់ ព្រះបាទ មហា វ៉ាជីរ៉ាឡុងកន ព្រះវ៉ាជីរ៉ាក់ក្លៅចៅយូហួរ ព្រះមហាក្សត្រនៃព្រះរាជាណាចក្រថៃ នៅព្រះបរមរាជវាំង។ ទន្ទឹមនោះ សម្តេចធិបតី នឹងចូលជួបសម្តែងការគួរសមដាច់ដោយឡែកជាមួយថ្នាក់ដឹកនាំនៃស្ថាប័ននីតិប្បញ្ញត្តិរួមមាន ​​ឯកឧត្តមប្រធានព្រឹទ្ធសភា និងឯកឧត្តមប្រធានរដ្ឋសភា នៃព្រះរាជាណាចក្រថៃ។

បន្ថែមពីលើនេះផងដែរ សម្តេចមហាបវរធិបតី ហ៊ុន ម៉ាណែត នឹងអញ្ជើញជួបពិភាក្សាការងារកិច្ចសហប្រតិបត្តិការទ្វេភាគីជាមួយឯកឧត្តម សេដ្ឋា ថាវីស៊ីន ព្រមទាំងអញ្ជើញចូលរួមពិធីចុះហត្ថលេខាលើឯកសារមួយចំនួនផងដែរ។ ដោយឡែក សម្តេចធិបតី ហ៊ុន ម៉ាណែត នឹងអញ្ជើញថ្លែងសុន្ទរកថាបើកនៅក្នុងវេទិកាធុរកិច្ចកម្ពុជា-ថៃផងដែរ។

សូមអានសេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ស្តីពីការអញ្ជើញបំពេញទស្សនកិច្ចផ្លូវការនៅព្រះរាជាណាចក្រថៃដូចខាងក្រោម៖